السلام عليكم ورحمة الله وبركاته ..
صباح الخير عليكم جميعاً
في رمضان الناس تحب الجلابيات والبعض يحس انها من أهميات رمضان فيبدون بقبل رمضان بفتره بتجميع الجلابيات
سبحان الله قبل ماكنت افكر بهالشي وماشوفه شي ضروري برمضان واستغرب اقبال البنات عليها
ورمضان هالسنه قررت اقتني جلابيه بس عشان اعرف ايش الرابط هههههه
اشتريت وحده من فئة الشالكي كذا حلوه وبارده
وبعدين فكرت اخذ جلابية تنفع اكشخ فيها لو عندي فطور او قهوة التراويح وكذا
فكنت كل ماتعجبني حاجه اتفاجئ بالسعر المبالغ فيه
مب بخل فيني, بس الشي مايستاهل لا من موديل ولا من قماش .. صحيح فيه شي متعوب عليه من شغل وتطريز وشك وفخامه ماقول لا بس شي بسيط مرررره ليه 500 ريال ؟؟؟؟
ومالكم بالطويله
بما اني خياطة مبتدأه ,عندي مجموعة من الاقمشه الي شريتها من فتره فقلت يلا منها اسوي لي جلابية ومنها اتعلم بنفسي
طبعاً هذيك الليله ماقدرت انام من الحماس والتفكير بالموديلات والخطط وو
صحيت مع الشمس وجبت مقصي والماركر ودبابيسي والمتر وفرشت القماش وبديت بسم الله الرحمن الرحيم
وهذي صورة الجلابيه الفستان الي سويتها احم
الموديل هو جداً بسيط عندي قميص حطيته على القماش وبديت احدد الشكل مربع تقريباً بس وسعته من تحت
حزام القيطان ربطته بوسطي عشان يعطيني شكل شوي لا تتخيلون اني ربطته كذا :D
ركبت كلفه على اطراف الكم وفتحة الرقبه :)
اخترت هالشكل لأن شفته كثير دارجه الكور بالشالات والبلايز
المجوهرات فضيه مكس بين الفضي والقيطان الذهبي
ولبست عليه بصباح العيد كمان سلسال ذهبي بحبات لولو ماسك على الرقبه
وخلخال ذهبي شي يناسب النهار
ولبست عليه كعب ارتفاعه بسيط لونه باذنجاني
ويارب لك الحمد النتيجة جيده جداً وراضيه فيها كمبتدأه
صحيح فيها اخطاء بسيطه لكن المرات الجايه باذن الله اتفاداها
عطوني رأيكم ياحبنيلكم <3
ليست هناك تعليقات:
إرسال تعليق