بسم الله الرحمن الرحيم
السلام عليكم ورحمة الله وبركاته
اليوم التدوينه مطبخيه هههه
احياناً الواحد تجيه شهوه على شي حالي بس ماله خلق يسوي شي طويييل ويفقد حماسه للحلى ويبطل ياكله
او اذا اكله مايحس بالطعم الي يبيه هههههه
مع العلم انا وحده مهما حاولت اني اتفنن بالحلويات واجرب شي جديد الا اني اخفق فيها ونادر يطلع معي شي مضبوط فذلك اختار الطريقه الاسهل والي اضمن انها ناجحه ومارح تحوسني واتحسف على المقادير والوقت الي راح
المهم جبت لكم اليوم طريقه بسيطه و اتوقع فيه كثير يسونها بس انا توني طايحه فيها من فتره :D .. وكل مره اغير واضيف لها شي عاد هنا لعبتي :P ..
نجي للمقادير..
- ١٥٠ مل الى ٢٠٠ مل حليب بارد
- ظرف كريم كرميل
- ظرف دريم ويب
- نصف ملعقة شاي الى ملعقه نسكافيه
- وشوي من الحليب المكثف المحلى
- كيك جاهز او بقايا كيك (مفتفت او مكعبات صغيره)
وللتزين اختياراتك من..
- جوز ولوز
- فستق
- مالتيزر وتشوكلت
- بودرة كاكاو
..
نبدا بتحضير الخليط
نحط كل المقادير ماعدا الكيك طبعاً ونخفقها لحد ماتتجانس وتثقل
الحليب المكثف المحلى انتي حطي على حسب درجة الحلاوه الي تبينها. يعني حطي وذوقي وكذا
واذا خلصتي خفقتيهم حطي الخليط بكيس نايلون او قمع التزيين او علبه حافظه وبالفريزر لمدة ربع الى ثلث ساعه عشان يتماسك ويتكثف اذا ماتكثف معك بمرحلة الخفق
والحين نكون محضرين صحون التقديم
ونحط الكيك بالقاعده ونضغط عليه شوي ونحط طبقه من الخليط إما بالقمع يكون اسهل او بالملعقه وعادي لو كان فيه فراغات
وبعدين نحط كيك وبعدين خليط ونكمل حسب الكميه الي عندنا واهم شي تكون آخر طبقه خليط الكريمه
ونزينها بتشوكليت او فستق وممكن بين الطبقات ترشين فستق ولا لوز وجوز مدقوق
او ترشين بودرة كاكاو.
وبس عليك بالف عافيه استمتعي بالطعم وعلى فكره اذا باقي عندك من الخليط ممكن يجلس بالثلاجه لمدة ٤ ايام .
