فضفضه ~

-

فيه وحده عربيه بانستقرام نشرت خبر اشاعه عن فتوى بالسعوديه (يجوز اسعاف المرأه لكن بشرط عدم لمسها)

 انا ماعمري سمعت عن الفتوى لكن من واقع اعيشه انقهرت منها ليش تنشر هالشي المغلوط وتقول شي غريب (يعني ضحكوني هالسعوديين!)

ارتفع ضغطي ولمن قريت الردود بردت حرتي ماشالله ماقصروا معها حتى الخليجيين وقفوا ضدها الي اسلوبه زين والي اسلوبه زباله الله يهديه.. انا ماهمني ايش جنسيتها بس اذا هي ماشافت بعينها ومتأكده وعاشته لا تتكلم وتنشر .. مب بس هي اي شخص ينشر اشاعات عن اي شي هو مب متأكد منه

انا احكي من تجربه شخصيه

زميله لي بالثانويه تعبت ومحتاجه اسعاف، جوا الاسعاف المدرسه واسعفوها مع العلم ان ولي امرها ماكن موجود ولا اي شخص يقرب لها متواجد؟ والاسعاف كانوا جميعهم رجال! اسعفوا البنت وانتهى الموضوع على خير

فمين الي له الحق يحكم انا الي عشت هالشي او الي عايشه بمكان مادري وين وحكمت؟ 

نزلت ڤديو بعد الصوره تقول انكم اتهمتوني باني مقصره بالدين لاني ماتحجبت! لكن انا مو مقصره بس لاني انا قررت اني ما اتحجب مو معناه مقصره وكل وحده تروح تهتم بدينها وحجابها! ، شي ينرفز صح؟

ماخلوها حتى بهالڤديو .. راحت حذفت الصوره والڤديو لول اقدر لها هالشي، كان مفروض انها لمن عرفت ان الخبر اشاعه حذفتها ماسترسلت مع المتابعين وردت عليهم وردوا عليها لحد مازاد الوضع عن حده وبدأوا يسبونها! صحيح اني احترمها كشخص لكن معليش ماتتعدين حدودك وما اتعدا حدودي صحيح ان فيه اشياء بالسعوديه ماتعجبني بس تظل وطني! فيه اشياء افتخر فيها واشياء للامانه ماودي تنذكر

مع العلم اني احس الآن السعوديه بدت تتفتح لكن ماتخلى من العقول المتخلفه المتعسفه الي الدين والإحسان فقط للرجال المرأه تاكل تبن وتنطق في بيتها واوص ولا كلمه!

يعني احس فكرة التشدد الفضيع الي كان زمان والمحرم الي لازم بكل مكان شاقلته معك بدأ ينجلي شويه شويه لكن افضّل تبقى هويتنا السعوديه موجوده ولا مانع من التطور والحريه الي من ابسط حقوقنا و لازلنا محرومين منها كانساء :(